Marco Rubio utanríkisráðherra Bandaríkjanna hefur verið staðinn að því að ganga í alltof stórum skóm. Þegar betur var að gáð reyndust fleiri úr ríkisstjórn Donalds Trump Bandaríkjaforseta vera í sama skótauinu og margir veltu því fyrir sér hvers vegna. Eru þetta bestu skórnir fyrir hægrimenn í dag? Er þetta einhver tíska sem er að ganga í Hvíta húsinu? Svarið reyndist nokkuð einfalt. Allir þessir aðilar fengu skóna að gjöf frá sjálfum forsetanum.
Mögulega geta margir tengt við þá fullyrðingu að skór séu ekki alltaf heppileg gjöf. Það er í það minnsta reynsla blaðamanns sem er með óvenjulegan fót. Skór sem passa á lengdina eru gjarnan of þröngir yfir tábergið og eins virðast skófyrirtæki ekki fara öll eftir stöðluðum stærðum. Hjá einu fyrirtæki þarf maður kannski skó nr. 40, en hjá næsta fyrirtæki nr. 39 og svo hjá því þriðja nr. 42 fyrir einhverja ástæðu.
Skógjöf forsetans mun samkvæmt The Cut byggja á einstöku dálæti hans á svokölluðum Florsheim-skóm. Þessir skór munu vera á skynsamlegu verði og hefur forsetinn tekið ástfóstri við þá. Vildi hann deila þessari gleði með sínum nánustu samstarfsmönnum og sendi þeim því sína eigin Florsheim-skó. Mögulega eru einhverjir að naga sig í handabökin fyrir að hafa hrósað forsetanum fyrir skóna án þess að innistæða væri fyrir því. Hvað sem því líður þá má nú gjarnan sjá heilu hópana af körlum úr ríkisstjórninni sem allir eru í Florsheim-skónum sínum. Þar með talinn áðurnefndur Marco Rubio, sem var þó svo óheppinn að fá Florsheim-skó sem eru of stórir á hann.
hmm
— derek guy (@dieworkwear.bsky.social) 11 March 2026 at 09:02
Í samtali við The Wall Street Journal segir einn ónefndur starfsmaður Hvíta hússins: „Þetta er drepfyndið því allir eru of hræddir til að klæðast þeim ekki.“ Því hefur Rubio látið sig hafa það að drösla sér hingað og þangað í alltof stórum skóm. Líklega veit hann ekki hvar þeir eru seldir, því annars hefði verið leikur einn fyrir ráðherrann að kaupa sér par sem passar. Ólíklegt verður að teljast að Trump láti samstarfsmenn sína fara úr skónum svo hann geti staðfest að þetta sé nákvæmlega parið sem hann gaf þeim.
Forsetinn sendi skóna út í desember og síðan þá hefur ítrekað sést til Rubio í þeim, einkum þegar hann er að mæta á viðburði ásamt forsetanum. The Cut deilir fjölda mynda sem hafa náðst af Rubio í Florsheim-skónum.
Wall Street Journal segir að tvennt geti skýrt hvers vegna skórnir passa ekki. Annars vegar að Rubio hafi logið um skóstærð sína til að missa ekki ímynduð karlmennskustig. Hins vegar þá þykir forsetanum víst gaman að giska á skóstærð fólks. Hann giskar á skóstærðina fyrir framan fólk og biður svo aðstoðarmann sinn um að panta par. Viku seinna kemur pakki merktur Florsheim í Hvíta húsið. Stundum skrifar Trump kveðju utan á kassann eða sendir þeim bréf þar sem hann þakkar fyrir samstarfið. Að sögn Hvíta hússins borgar forsetinn sjálfur fyrir skógjafir sínar. Meðal þeirra sem hafa gengið Florsheim-gjöf eru, auk Rubio, JD Vance varaforseti, varnarmálaráðherrann Pete Hegseth, viðskiptaráðherrann Howard Lutnick, samskiptastjórinn Steven Cheung og ræðuritarinn Ross Worthington og fleiri.
