Borðtuskum er reglulega strokið yfir eldavélina, eldhúsborðið og matarborðið. En það er full ástæða til að sýna ákveðna aðgát hvað varðar borðtuskur því þær geta verið ein stærsta bakteríusprengja heimilisins. Þær geta verið fullar af matarleifum og kjötsafa, sem getur innihaldið salmonellu og aðrar óæskilegar bakteríur sem geta valdið veikindum hjá fólki.

Kamfýlóbakter er sú baktería sem fólk smitast kannski einna helst af en hún er í hráu kjöti og getur auðveldlega endað í borðtuskunum. Bakterían veldur slæmri sýkingu í maga með niðurgangi, uppköstum og hita.

Það er því mikilvægt að skipta oft um borðtusku. Hversu oft hangir saman með hversu hreint það er almennt á heimilinu og hversu margir búa saman. Þeim mun fleiri, þeim mun stífari kröfur ætti að gera til þrifa en þumalputtareglan er að skipta eigi um borðtusku einu sinni á dag. Þær þarf að þvo við minnst 60 gráður til að drepa bakteríurnar.

Viskastykki eru almennt ekki notuð til að þurrka matarleifar upp og því þarf ekki að skipta þeim eins oft út. Það ætti að nægja að skipta þeim út 2-3 í viku. En að sögn sérfræðinga, sem Danska ríkisútvarpið ræddi við, er gott nú á kórónuveirutímum að skipta viskastykkjum út daglega til að sýna ýtrustu aðgæslu.