Leigusali í Detroit í Bandaríkjunum gerði skelfilega uppgötvun í garðinum við leiguhúsnæði, sem Brandee Pierce, hafði leigt. Hún var flutt og var hann að gera íbúðina klára fyrir næsta leigjanda þegar hann sá lítinn fót standa upp úr jarðveginum.

Hann hringdi auðvitað strax í lögregluna sem mætti á vettvang og gróf upp lík hins 9 ára Zemar King. Pierce, sem er móðir hans, er nú í haldi vegna málsins og verður ákærð fyrir að hafa myrt hann og hann að hafa grafið hann í grunnri gröf í garðinum.

Líkið fannst í byrjun janúar en saksóknari segir að Pierce hafi barið drenginn til bana þann 24. október síðastliðinn. Hún hafi síðan yfirgefið íbúðina í byrjun nóvember og farið til Georgíu með 3 ára son sinn.

Lögreglan í Brookhaven, sem er nærri Atlanta, hafði samband við lögregluna í Detroit í desember en hún var þá að rannsaka mál tengt Pierce og 3 ára syni hennar. Pierce var handtekin 10. janúar vegna rannsóknarinnar á dauða Zemar. Hún var framseld frá Georgíu til Michigan í síðustu viku.

Pierce á ævilangt fangelsi yfir höfði sér ef hún verður fundin sek um að hafa myrt son sinn.