Stúlkurnar voru að keppa síðastliðið föstudagskvöld en töpuðu mikilvægum leik. Stúlkurnar voru eðli málsins samkvæmt svekktar í leikslok en enginn hagaði sér þór verr en þjálfarinn, Jim Zullo.
Það náðist á myndband þegar Zullo gekk upp að einum besta leikmanni liðsins, Hailey Monroe, og reif í hár hennar áður en hann lét nokkur vel valin orð falla. Stúlkurnar í liðinu eru 15, 16 og 17 ára gamlar.
Hailey stóð þarna með liðsfélögum sínum og var í sýnilegu uppnámi eftir tapið áður en þjálfarinn gerði illt verra með glórulausri hegðun sinni. Þá hjólaði hann í aðra stúlku sem virtist reyna að koma Hailey til varnar.
Zullo sagði eftir leik að atvikið hefði orðið þegar hann sagði Hailey að taka í höndina á andstæðingum sínum og þakka fyrir leikinn. Það vildi hún ekki gera og mun hún, samkvæmt Zullo, hafa sýnt honum dónaskap.
Zullo var rekinn örfáum klukkustundum eftir leik og baðst hann afsökunar í yfirlýsingu sem hann sendi frá sér í kjölfarið.
„Sem þjálfari þá er það ekki undir nokkrum kringumstæðum réttlætanlegt að leggja hendur á leikmann og mér þykir mjög leiðinlegt að þetta hafi gerst. Ég vildi að ég gæti tekið þetta til baka,” sagði hann en hann hefur verið kærður til lögreglu vegna málsins.
