Sem betur fer hefur vitundarvakning átt sér stað hvað varðar að endurnýta hluti sem ekkert er að. Til dæmis með því að gefa föt, sem maður er hættur að nota, til hjálparsamtaka eða annarra sem reka notað og nýtt verslanir.

Ekki skemmir fyrir að fólk getur oft gert góð kaup í slíkum verslunum og dottið niður á sannkallaða gullmola.

Kannski fannst JoAnn, sem býr í Norður-Karólínu í Bandaríkjunum, að hún hefði dottið í lukkupottinn þegar hún fann fallegan rauðan jakka í slíkri verslun. Hún keypti jakkann. Síðan fann hún miða í honum með skilaboðum sem gera að verkum að margir telja að hún eigi ekki að nota jakkann.

Daily Mail skýrir frá þessu og segir að JoAnn hafi farið í verslunina með unnusta sínum.  Þeim hafi litist vel á jakkann og keypt hann.

Þegar JoAnn fór í jakkann, fann hún miða, sem var festur með títuprjóni, sem á stóð: „Jarðsetjið mig í þessum rauða jakkanum.“

Scott deildi mynd af jakkanum og miðanum á samfélagsmiðlum og fór færslan eins og eldur í sinu um netheima.

Viðbrögðin voru blendin, margir höfðu samúð með hinum látna eiganda jakkans því hinsta ósk hans hafi ekki verið virt.

„Ég vona að hún hafi verið grafin í einhverju frábæru,“ skrifaði einn og annar skrifaði: „Svo sorglegt. Fjölskylda hennar sá líklega aldrei miðann.“

Þriðja manneskjan sagðist ekki geta hugsað sér að klæðast jakkanum eftir að hafa lesið skilaboðin.