Samkvæmt því sem bresku krabbameinssamtökin Cancer Research UK segja, þá ætti fólk að vera vakandi fyrir því hvort það svitni á hverri nótt og hvort það glími við óútskýrða þreytu. Þetta getur hvort tveggja verið merki um krabbamein.
Flestir svitna á nóttunni en ef þú vaknar oft við að lakið er rennandi blautt sem og náttfötin, þá ættir þú að hafa samband við lækni.
Express segir að samkvæmt því sem bresk heilbrigðisyfirvöld segi, þá flokkist það sem nætursviti ef maður svitni svo mikið að náttfötin og sængurfatnaðurinn sé gegnblautur, jafnvel þótt það sé svalt þar sem sofið er.
Nætursviti getur verið fylgifiskur breytingaskeiðsins, sýkinga eða vegna ákveðinna lyfja en hann getur einnig verið merki um krabbamein.
Þreyta er oft tengd við of lítinn svefn eða tímabundna sjúkdóma en ef fólk glímir við sífellda þreytu, þá getur það verið merki um krabbamein.
Cance Research UK segir að krabbameinstengd þreyta sé ástand sem hverfur ekki þrátt fyrir svefn eða hvíld og getur haft áhrif á fólk, líkamlega, andlega og tilfinningalega.
Merki um krabbameinstengda þreytu geta meðal annars verið:
Tilfinning um að vera örmagna, jafnvel eftir minniháttar hreyfingu.
Vandamál við að sofa og erfiðleikar við að fara á fætur á morgnana.
Einbeitingarskortur og minnkandi áhugi á daglegum athöfnum.
