Fulltrúadeildarþingmaðurinn Marjorie Taylor Greene ætlar að hætta á þingi á nýju ári. Hún var áður mikill stuðningsmaður Donalds Trump Bandaríkjaforseta en hefur nú snúið við honum baki og ákvað á dögunum að láta allt fjúka í viðtali við The New York Times. Þar útskýrir Greene að kornið sem fyllti mælinn hafi verið mál níðingsins Jeffreys Epstein og viðbrögð forsetans við kröfu hennar um að öll Epstein-skjölin yrðu opinberuð.

„Epstein-skjölin eru tákn alls þess sem er að í Washington,“ sagði Greene. „Rík og valdamikil elíta sem fær að komast upp með hrottalega hluti á kostnað kvenna.“

Greene ræddi við þolendur Epsteins í september á lokuðum fundi eftirlitsnefndar fulltrúadeildarinnar. Hún segir að lýsingar þolenda hafi sýnt hversu mikilvægt væri að draga alla þá sem áttu hlut að glæpum Epsteins til ábyrgðar. Hún kallaði til blaðamenn og hótaði því að ef stjórnvöld vörpuðu ekki hulunni af samverkamönnum Epsteins myndi hún gera það sjálf í samstarfi við þolendur.

Fyrir vikið fékk hún reiðilestur frá forsetanum og segir að þetta hafi í raun verið þeirra seinasta formlega samtal. Að sögn þeirra sem urðu vitni að símtalinu gátu allir viðstaddir heyrt öskrin í forsetanum.

Forsetinn mun meðal annars hafa öskrað: „Vinir mínir verða fyrir skaða.“

Greene segist þá hafa stungið upp á því að forsetinn fengi þolendur í heimsókn til sín í Hvíta húsið. Þannig gæti Trump sýnt heiminum að hann væri að hlusta. Að sögn Greene tók Trump ekki vel í þessa hugmynd og sagði að þolendur hefðu ekkert gert til að eiga slíkan heiður skilið.

Greene lýsti símtalinu nýlega í viðtali við 60 Minutes með eftirfarandi hætti:

„Við ræddum um Epstein-skjölin og hann var mjög reiður yfir því að ég hafi skrifað undir kröfu um að skjölin yrðu birt. […] Hann sagði að slíkt myndi valda tilteknum einstaklingum skaða.“

Greene segir nú að Trump sé ekki sá maður sem hún taldi hann vera. Hún leit á hann sem mann fólksins.

„Ég var bara svo barnaleg og hafði staðið fyrir utan stjórnmálin. Það var auðvelt fyrir mig að trúa í blindni.“

Greene segir að Trump hafi svo sýnt sitt rétta andlit eftir að hann tók við embætti. Forsetinn haldi því fram að hann sé kristinn, en orðræða hans og framkoma í garð annarra bendi til hins gagnstæða.

„Allir segja: hún er búin að breytast. Ég hef engu breytt með mínar skoðanir, en ég hef þroskast. Ég hef öðlast meiri dýpt. Ég er búin að læra á stjórnmálakerfið og sé hvað það er brotið.“