Leikkonan Nicola Peltz virðist hafa skotið á David og Victoria Beckham í áframhaldandi fjölskylduerjum sem snúa að eiginmanni hennar, Brooklyn Beckham.

Undanfarin ár hefur Brooklyn, elsti sonur David og Victoriu, átt í opinberum deilum við foreldra sína. Nýjustu fregnir herma að hann hafi lokað á þau, sem og systkini sín, á samfélagsmiðlum og jafnframt ákveðið að verja jólunum fjarri Beckham-fjölskyldunni. Þetta kom í kjölfar þess að Victoria setti like við myndband þar sem Brooklyn sýndi fylgjendum sínum hvernig hann eldaði kjúkling. Fór það öfugt ofan í hann.

Yfir jólin birtu David og Victoria myndband af sér dansandi við lagið We’ve got nothing to be sorry for, sem margir túlkuðu sem svar til sonarins. Nú virðist Peltz hafa brugðist við með sínum hætti. Hún birti á Instagram með tilvitnun í frönsku leikkonuna Brigitte Bardot. „Ef ég gæti breytt því hvernig fólk kemur fram hvert við annað myndi ég gera það, en þar sem ég get það ekki, held ég mig við dýr,“ sagði þar.

Sama dag deildi Peltz einnig mynd af sér heima hjá foreldrum sínum í Bandaríkjunum með textanum „elska að vera heima.“ Óljóst er hvort Brooklyn hafi verið boðið til fjölskyldu sinnar um jólin og hafnað boðinu eða ekki, en ljóst er að spennan innan Beckham-fjölskyldunnar heldur áfram.