Hann játaði sök fyrir dómi. Mörgum þykir dómurinn vægur og hefur breski ríkissaksóknarinn tilkynnt að hann sé með málið til skoðunar. Breskir fjölmiðlar hafa velt því upp að Axel muni ekki eiga sjö dagana sæla í fangelsi því barnamorðingjar og barnaníðingar séu í litlum metum hjá öðrum föngum sem beiti þá oft miklu ofbeldi.
Við réttarhöldin kom fram að Axel hafði sankað að sér nauðsynlegum efnum til að búa til hið banvæna eitur rísín. Hann hefði getað búið til nóg eitur til að bana rúmlega 12.000 manns.
Daily Mail skýrir frá þessu og segir að lögreglan hafi fundið 150 rísínolíuplöntur undir rúminu hans. Voru þær geymdar í nestisboxi.
Lögreglan segir að með þessu magni af plöntunni hefði verið hægt að framleiða 1,07 til 5,33 grömm af rísíni. Það þarf aðeins tvö milligrömm til að bana fullorðnum.
Deanne Heer, sem stýrði rannsókn málsins, sagði við réttarhöldin að Axel hefði getað búið til nóg af eitri til að bana mörg þúsund manns ef fólkið hefði andað eitrinu að sér.
Það var ekki nóg með að hann hafi verð með nóg af plöntunni til að bana mörg þúsund manns, hann hafði einnig gert skriflega áætlun um hvernig hann ætlaði að gera það.
Heer sagði að nákvæm áætlun hefði fundist hjá honum um hvernig hann ætlaði að koma eitrinu í neysluvatn og dreifa því í lofti.
