Margar bandarískar og evrópskar leyniþjónustustofnanir sem og netöryggisstofnanir sendu nýlega frá sér sameiginlega skýrslu um rússneskan hóp sem heitir „26165“ en hann er umvafinn mikilli dulúð.

Hópurinn heyrir undir rússnesku leyniþjónustuna GRU og er mikilvægur hluti af ríkisreknum nethernaði Rússa gegn vestrænum fyrirtækjum og stofnunum að því er segir í skýrslunni.

Í skýrslunni segir að hópurinn hafi allt frá upphafi stríðsins í Úkraínu reynt að brjótast inn í tölvukerfi fjölda vestrænna fyrirtækja og opinberra stofnana. Ekki kemur fram hvort hópnum hafi tekist að brjótast inn í tölvukerfin.