Unglæknirinn Sanjay Kuikeel, eiginkona hans, Nilima Gautam, og tvö börn þeirra fóru til Nepal fyrir skemmstu til að heimsækja ættingja. Þegar þau komu heim sat maður í stofusófanum, reykti sígarettu og borðaði pizzu.
Í ljós kom að hústökufólk hafði lagt heimili þeirra undir sig og stolið öllu steini léttara, þar á meðal skartgripum, fatnaði, töskum og eldhúsáhöldum svo eitthvað sé nefnt. Talið er að hústökufólkið hafi stolið verðmætum fyrir nokkrar milljónir króna. Þar að auki var mikill óþrifnaður í húsinu.
Í samtali við 10 News segir Nilima að eiginmaður hennar hafi spurt manninn í sófanum hvað í veröldinni hann væri að gera. „Hann sagði: „Ég á heima hérna.“ Þetta var mjög óhugnanlegt, sérstaklega þar sem börnin voru með okkur,“ segir hún.
Hún bætir við að maðurinn í sófanum hafi augljóslega verið drukkinn og hann hafi virst njóta lífsins vel í sófanum þar sem hann gæddi sér á pizzu.
Fjölskyldan hafði samband við lögreglu sem kom á staðinn og fjarlægði manninn, en í fréttum ástralskra fjölmiðla kemur fram að hann hafi komið aftur í nokkur skipti og haldið því fram að heimilið væri hans.
Nágrannar höfðu ítrekað haft samband við lögreglu vegna hávaða frá heimilinu og segir lögregla að um 17 til 20 manns hafi dvalið í húsinu á meðan þau voru fjarverandi. Hjónin höfðu ákveðið að leigja íbúðina í skammtímaleigu á meðan þau voru erlendis en það hefðu þau betur látið ógert.
Hjónin hafa skipt um lása á húsinu og þá hefur verið blásið til söfnunar á vefnum GoFundMe vegna tjónsins sem þau urðu fyrir.
