Það styttist í sumarfríið og þar með jafnvel flugferðir til útlanda. Þegar flugið er pantað, vilja margir tryggja sér sæti við glugga eða neyðarútganginn en það þarf yfirleitt að greiða aukalega fyrir þessi sæti. En það er hægt að fá enn betra sæti fyrir mun minni upphæð og jafnvel ókeypis.

Nordkurier skýrir frá þessu og segir að sætin sem um ræðir séu öftustu sætin, þau sem eru næst klósettinu. Þetta eru að mati miðilsins vanmetnustu sætin í flugvélum.

Travelbook segir að margir kostir fylgi því að sitja í þessum sætum, eitthvað sem stærstu aðdáendur þess að sitja við neyðarútgang ættu að skoða.

Það er aðallega aukið öryggi fólgið í að sitja í þessum sætum. Time Magazine skoðaði flugslysasögu 35 ára og komst að þeirri niðurstöðu að miðsætið í öftustu sætaröðinni sé öruggasta sætið í flugvélinni.

Þess utan fær maður oft meiri ró og frið í þessum sætum en ef maður situr framar í vélinni. Það sitja engin börn fyrir aftan þig og sparka í sætið, engin hnerrar í hnakkann á þér og kannski situr enginn við hliðina á þér af því að enginn vildi bóka þau sæti.

Það er einnig kostur að klósettið er mjög nálægt og þú þarft ekki að þramma í gegnum farþegarýmið til að komast á klósettið. En á móti kemur að stundum getur myndast röð við hliðina á sætinu þínu þegar fólk bíður eftir að komast á klósettið. Svo er ekki hægt að útiloka að nefið þitt fái öðru hvoru að kenna á því sem farþegar losa sig við á klósettinu.