„Hann væri niðurbrotinn. Hann væri sorgmæddur. Bandaríkin, sem ég ólst upp í, og við höfum þekkt, eru Bandaríki sem áttu bandamenn og voru vinir annarra ríkja. Það eru Bandaríkin sem við þekkjum. Skyndilega eru þetta ekki Bandaríkin lengur. Skyndilega hatar heimsbyggðin okkur.“

Þetta sagði Patti Davis, dóttir Ronald Reagan fyrrum forseta Bandaríkjanna, í samtali við CNN.

Gagnrýni hennar kemur í kjölfar aðgerða Donald Trump nú í upphafi annars kjörtímabils hans sem forseta. Aðgerðir hans og ummæli hafa hvað eftir annað vakið mikla athygli um allan heim.

Hann hefur meðal annars hótað að beita valdi til að ná yfirráðum á Grænlandi og yfir Panamaskurðinum. Hann hefur einnig lagt refsitoll á vörur frá mörgum ríkjum sem hafa verið nánir bandamenn Bandaríkjanna árum saman.

Stjórnarhættir af þessu tagi eru víðs fjarri þeirri línu sem Ronald Reagan lagði í forsetatíð sinni.

„Mér finnst einelti ekki vera styrkleikamerki. Mér finnst það ekki styrkleiki að vera árásargjarn. Styrkur er að mynda bandalög. Það þýðir ekki að maður eigi ekki að standa fast á sínu en styrkur er að skilja að maður hefur þörf fyrir bandamenn í heiminum,“ sagði Davis.