Það eru loftslagsbreytingarnar sem ýta undir fjölgun rotta að sögn Jonathan Richardson, prófessors í líffræði við University of Richmond. Hann rannsakaði þessa fjölgun rotta eftir að hann sá fréttir um að þær væru nánast að taka sumar borgir yfir.
CNN segir að hann og samstarfsfólk hans hafi fengið gögn um rottur frá 200 stærstu bandarísku borgunum en aðeins 13 þeirra voru með nægilega góð gögn sem uppfylltu þau skilyrði sem vísindamennirnir settur fyrir notkun þeirra.
Til að gefa rannsókninni alþjóðlegra yfirbragð var einnig notast við gögn frá Toronto í Kanada, Tókýó í Japan og Amsterdam í Hollandi.
Gögnin náðu að meðaltali yfir 12 ár og náðu til tilkynninga um að rottur hefðu sést, veiðar á þeim og skýrslu eftirlitsmanna.
Mikil aukning var á rottum í 11 af borgunum 16 á tímabilinu sem rannsóknin náði til. Hún var nýlega birt í vísindaritinu Science Advances.
Mesta aukning var í Washington DC, San Francisco, Toronto, New York og Amsterdam. Í þremur borgum fækkaði rottunum. Það var í New Orleans, Louisville og Tókýó.
Vísindamennirnir segja að ýmsir þættir ráði því að rottunum hafi fjölgað en aðalástæðan sé loftslagsbreytingarnar.
Richardson benti á að rottur séu lítil spendýr og kuldi haldi stofninum niðri. Hlýrra loftslag, sérstaklega að vetri til, veiti þeim tækifæri til að vera lengur úti við og lengri tíma til að fjölga sér.
Hlýrra loftslag getur einnig lengt vaxtartíma gróðurs en það tryggir rottunum meiri fæðu og gróður til að fela sig í. Michael Parson, vistfræðingur og sérfræðingur í rannsóknum á villtum rottum, sagði í samtali við CNN að meira að segja lykt af mat og rusli berist lengra í meiri hita.
