Fingurinn reyndist vera af David Balland sem stofnaði fyrirtækið Ledger með Eric. Verðmæti fyrirtækisins er talið vera sem nemur 200 milljörðum króna.
Myndbandið markaði upphaf 48 klukkustunda drama þar sem franska lögreglan leitaði örvæntingarfull að David og eiginkonu hans, Amandine. Þeim hafði verið rænt af glæpagengi.
Martröðin hófst á þriðjudagsmorgun í síðustu viku þegar David og Amandine voru vakin upp af vopnuðum mönnum. Þetta gerðist á heimili þeirra í Vierzon, sem er sunnan við París. Þau voru numin á brott af heimili sínu og strax aðskilin.
RTL og Le Parisien segja að níu karlar og ein kona, öll á aldrinum 20 til 40 ára, hafi verið að verki. Fólkið er allt franskt.
Með myndbandinu fylgdi krafa um greiðslu lausnargjalds upp á 10 milljónir evra í rafmynt.
Á meðan lögreglan leitaði hjónanna í kappi við tímann, gengu þau í gegnum langa martröð. David var haldið í bænum Chateauroux en Amandine var ekið á milli margra staða.
Lögreglan fann hana að lokum bundna og liggjandi í bíl á bílastæði í bænum Étampes á fimmtudeginum. Blóðblettir og hurðaopnari lágu á jörðinni að sögn BFM TV.
David fannst einnig á lífi. Það var á miðvikudeginum sem sérsveitin GIGN, sem er sérhæfð í að takast á við hryðjuverkamenn og gíslatökumenn, fann hann og frelsaði. Hann var illa á sig kominn og var lagður inn á sjúkrahús.
Á meðan á samningaviðræðum stóð við mannræningjana, greiddi ríkið hluta af lausnargjaldinu en færslan var fryst áður en hún komst alla leið til þeirra.
Europe 1 segir að mannræningjarnir eigi ævilangt fangelsi yfir höfði sér.
