Þær brutust inn í Gottsundaskólann í Uppsölum og kveiktu þar eld. Afleiðingarnar voru skelfilegar því skólinn brann til kaldra kola og var tjónið metið á mörg hundruð milljónir króna.
Í viðtalinu lýsir Sara því að í stað þess að fara heim þetta örlagaríka kvöld hafi þær tekið síðasta strætóinn til Gottsunda þar sem fóru inn í skólann í gegnum glugga.
Kalt var í veðri þetta kvöld og segir Sara að vinkonurnar hafi tekið þá skelfilegu ákvörðun að kveikja eld í skólanum til að hlýja sér. Eldurinn var fljótur að breiðast út og fyrr en varði varð skólinn alelda og fékk slökkvilið ekki við neitt ráðið.
Sara er orðin tvítug í dag og það er útlit fyrir að málið muni elta hana um ókomna tíð. Fyrir nokkrum mánuðum fékk hún bréf í pósti þar sem hún og vinkona hennar, sem einnig er tvítug, voru krafðar um 75 milljónir sænskra króna, 970 milljónir króna, vegna eldsvoðans 2018.
Um er að ræða endurkröfu frá tryggingafélagi skólans vegna eldsvoðans. Gerir félagið einnig kröfu um að stúlkurnar verði látnar greiða vexti og hækkar upphæðin um sem nemur 330 þúsund krónum á dag.
„Þetta eru miklir peningar en maður þarf að taka ábyrgð á því sem maður gerir,“ segir Sara í viðtalinu við SVT. Eðli málsins samkvæmt er Sara ekki borgunarmanneskja fyrir þessari upphæð og mun málið því koma til kasta dómstóla í haust að því er segir í umfjöllun SVT.
