Allt frá hryðjuverkaárás Hamas í Ísrael þann 7. október á síðasta ári hefur orðið sprenging hvað varðar gyðingahatur og árásum á gyðinga í Frakklandi. Nýlega var ráðist á bænahús gyðinga í bænum La Grande-Motte, sem er nærri Montpellier, og þykir árásin vera skelfileg áminning um að gyðingahatur sé að taka á sig enn hættulegri mynd en áður og segja  yfirvöld að gyðingahatur hafi aukist mikið á síðustu mánuðum.

Árásarmaðurinn, sem er 33 ára og frá Alsír, var með skammbyssu og palestínskan fána bundinn um mittið. Hann reyndi að kveikja í bænahúsinu áður en laugardagsguðþjónusta átti að hefjast. Að sögn franskra fjölmiðla kveikti hann fyrst í tveimur bílum fyrir framan bænahúsið. Því næst skrúfaði hann frá gaskút, sem var tengdur við grill á staðnum, og sprakk hann.

Fimm manns, þar á meðal rabbíninn, voru inni í bænahúsinu en lögreglan kom fljótt á vettvang og náði að slökkva eldinn. Einn lögreglumaður meiddist lítillega.

Árásarmanninum tókst að flýja en var handtekinn 15 klukkustundum síðar í Nimes.

En rannsókn málsins og yfirheyrslur yfir manninum hafa leitt í ljós að þetta hefði getað farið miklu verr. Ef hann hefði látið til skara skríða aðeins seinna um morguninn hefði bænahúsið væntanlega verið fullt af fólki. Rannsóknin leiddi einnig í ljós að maðurinn var með öxi meðferðis og hafði í hyggju að ráðast á fólk sem reyndi að flýja eldhafið.

Hryðjuverkalögreglan fer með rannsókn málsins og er það til merkis um hversu alvarlegt það er.