Lögreglumanni í Manchester á Englandi hefur verið vikið frá störfum á meðan rannsókn á fólskulegu ofbeldi sem hann beitti fer fram. Lögreglumaðurinn náðist á myndband sparka í og traðka á höfði liggjandi manns á flugvellinum í Manchester á þriðjudag.

Mennirnir, Amaad og Fahir, voru handteknir á þriðjudagskvöld vegna gruns um líkamsárás á flugvellinum en málavextir eru nokkuð óljósir. Í umfjöllun Mail Online kemur fram að lögreglumaðurinn í myndbandinu hafi sparkað í manninn eftir að hann veittist að kvenkyns lögregluþjóni með þeim afleiðingum að hún nefbrotnaði. Alls voru fjórir menn handteknir á flugvellinum, Amaad og Fahir þar á meðal.

Reiðin beinist þó að valdbeitingu lögreglumannsins sem sparkaði í höfuð annars mannanna á meðan hann lá á kviðnum og gat ekki borið hendur fyrir höfuð sér. Mennirnir sem um ræðir eru af erlendum uppruna en báðir búsettir á Englandi.

Fjölmenn mótmæli fóru fram fyrir utan lögreglustöðina í Rochdale, þar sem annar mannanna býr, í gærkvöldi og var lögregla meðal annars sökuð um rasisma. Þá eru frekari mótmæli fyrirhuguð fyrir utan húsakynni Andy Burham, borgarstjóra Manchester, í kvöld.

Í frétt Daily Mail kemur fram að lögregla sé með málið til rannsóknar og óháður aðili muni fara yfir atburðarásina í fyrrakvöld.