Samkvæmt nýjum tölum þá er ólífuolía sú vara sem næstmest er stolið úr stórmörkuðum á Spáni um þessar mundir. Ástæðan er að verð á ólífuolíu hefur hækkað mikið vegna mikill þurrka í sunnanverðri Evrópu en þeir hafa komið illa niður á ólífuræktun.

Sky News segir að skipulögð glæpagengi beini nú sjónum sínum í miklum mæli að ólífuolíu sem er oft kölluð „fljótandi gull“. Stela gengin henni og selja síðan.

Nú er svo komið að aðeins áfengi er meira stolið úr spænskum stórmörkuðum. Í þriðja sæti er Iberico skinka.

Einn lítri af hágæða ólífuolíu kostaði tæpar 5 evrur fyrir fjórum árum. Nú kostar hann um 14 evrur.

Spánn er stærsta framleiðsluland ólífuolíu í heiminum og fjölskyldur kaupa hana yfirleitt í miklu magni til að nota við matseld.

Til að bregðast við þjófnaði á henni hafa stórmarkaðir gripið til þess ráðs að festa fimm lítra ólífuolíuflöskur saman með keðjum og læsa þeim. Í sumum verslunum er búið að setja þjófavörn á eins lítra flöskur. En þjófar nota oft sterka segla til að losa þessar þjófavarnir af flöskunum.