Samkvæmt því sem kemur fram í skýrslu, sem bandaríska varnarmálaráðuneytið sendi frá sér á föstudaginn, þá eru engar sannanir fyrir því að geimverur hafi heimsótt jörðina né að reynt hafi verið að leyna upplýsingum um geimverur og atburði sem sumir telja tengda þeim.

Dpa skýrir frá þessu og segir að samkvæmt því sem kemur fram í skýrslunni þá séu mörg mál, þar sem fólk hefur séð „óþekkt fljúgandi fyrirbæri“ (oft nefnt fljúgandi furðuhlutir), enn óupplýst. Í flestum þeirra er það skortur á nothæfum gögnum sem gerir að verkum að ekki hefur tekist að upplýsa þau.

Segja skýrsluhöfundar að það hafi bæði skort á mönnun og úrræði til að hægt væri að rannsaka tilkynningar um óþekkt fljúgandi fyrirbæri nægilega vel og það hafi einnig komið í veg fyrir að hægt sé að deila upplýsingum.

Í skýrslunni er sjónum aðallega beint að tilkynningum um óþekkt fljúgandi fyrirbæri í Bandaríkjunum frá 1945 og einnig er vísað í leynileg skjöl bandarískra yfirvalda.