Einstaklingur sem var úti að ganga með hundinn sinn í austuhluta London í gærkvöldi gekk fram á innkaupapoka sem viðkomandi þótti grunsamlegur. Manneskjunni dauðbrá þegar hún leit nánar ofan í pokann og sá að í honum var nýfætt barn vafið inn í handklæði.

Þetta kemur fram í umfjöllun Daily Mail.

Sex stiga frost var úti þegar barnið, sem er stúlka, fannst. Lögreglan óskar eftir upplýsingum frá þeim sem kunna mögulega að búa yfir upplýsingum um hverra manna stúlkan er og hvetur móður hennar eindregið til þess að gefa sig fram.

Þrátt fyrir kuldann og að hafa aðeins handklæði til að halda á sér hita er litla stúlkan sögð ósködduð en er sem stendur undir eftirliti heilbrigðisstarfsfólks.

Lögreglan hefur tilkynnt fundinn til félagsmálayfirvalda.

Fólk sem kann að þekkja til stúlkunnar eða móður hennar er beðið um að hafa samband við lögregluna sem allra fyrst.

Yfirlögregluþjónn þakkaði manneskjunni sem fann barnið og segir að viðkomandi hafi haldið hita á barninu þar til sjúkrabíll kom á vettvang. Hann þakkaði einnig vitnum sem dvöldu á vettvangi til að ræða við lögreglu og bráðaliða og segir þau hafa átt sinn þátt í að bjarga lífi stúlkunnar.

Hann segir lögregluna hafa miklar áhyggjur af heilsu og velferð móðurinnar þar sem hún hefði þurft á aðstoð heilbrigðisstarfsfólks að halda í kjölfar þess að hafa fætt barn. Heilbrigðisstarfsfólk og sérþjálfaðir lögreglumenn séu tilbúin til að aðstoða hana. Hún er eindregið hvött til að hafa samband í síma eða einfaldlega mæta á næsta spítala eða lögreglustöð.