Ísraelsmenn eru sagðir hafa smíðað símboðana frá grunni sem sprengdu fjölmarga meðlimi Hisbollah-samtakanna í fyrradag. Því hefur verið haldið fram að átt hafi verið við símboðana og sprengiefni komið fyrir í þeim en þetta mun ekki vera rétt ef marka má umfjöllun New York Times.

Mossad, ísraelska leyniþjónustan, er sögð hafa sett á fót skúffufyrirtæki sem virðast hafa haft þann eina tilgang að framleiða umrædda símboða. Undirbúningurinn virðist hafa verið þaulskipulagður og augljóst að um langtímaverkefni var að ræða hjá Ísraelsmönnum.

Skúffufyrirtæki í Búdapest

Eitt af skúffufyrirtækjum Mossad, B.A.C. Consulting í Búdapest, höfuðborg Ungverjalands, framleiddi símboðana sem síðan voru sendir til Líbanons. Fyrirtækið fékk leyfi hjá taívanska tæknifyrirtækinu Gold Apollo til að framleiða fyrrnefnda símboða fyrir þeirra hönd.

Forstjóri Gold Apollo, Hsu Ching-kuang, sagði við blaðamenn í gær að B.A.C Consulting hefði haft samning við fyrirtækið undanfarin þrjú ár.

„Samkvæmt þessum samningi þá leyfum við B.A.C að nota nafnið okkar á ákveðnum svæðum, en hönnunin og framleiðslan er algjörlega á ábyrgð B.A.C,“ sagði Gold Apollo í yfirlýsingu í gær.

Framleiddu líka hefðbundna símboða

Í umfjöllun New York Times kemur fram að tvö önnur skúffufyrirtæki að minnsta kosti, annað þeirra í Búlgaríu þar sem Norðmaður var skráður forsvarsmaður, hafi verið notuð til að hylja slóð Mossad.

Bent er á það að B.A.C hafi einnig verið með venjulega kúnna og framleitt venjulega símboða sem innihéldu ekkert sprengiefni. En eini raunverulegi kúnninn sem B.A.C hafði áhuga á voru liðsmenn Hisbollah-samtakanna og símboðarnir sem þeir fengu voru langt því frá venjulegir. Þeir innihéldu sprengiefnið PETN sem búið var að koma fyrir í rafhlöðum símboðanna.

Eftir að sprengingarnar örkumluðu fjölmarga liðsmenn Hisbollah og urðu að minnsta kosti tólf til bana voru ummæli Hassan Nasrallah, aðalritara samtakanna, frá því fyrr á þessu ári rifjuð upp.

Þar hvatti hann liðsmenn Hisbollah til að notast frekar við símboða en farsíma af ótta við að Ísraelsmenn gætu hlerað eða komist inn í samskipti meðlima. Ef marka má umfjöllun New York Times voru Ísraelsmenn þegar með ráðabruggið í smíðum þegar Nasrallah lét ummæli sín falla.

Talið er að fyrstu sendingarnar af símboðum B.A.C hafi komið til Líbanon árið 2022 en í litlu magni til að byrja með. Eftir að Nasrallah hvatti liðsmenn sína til að nota frekar símboðana fór framleiðslan á fullt þar sem eftirspurnin var mikil. Og þar sem símboðarnir höfðu reynst vel – enn sem komið er – héldu Hisbollah-samtökin áfram að eiga viðskipti við B.A.C.

Heimildarmenn New York Times segja að Mossad hafi virkjað hvellhetturnar í símboðunum með því að senda skilaboð sem virtust koma frá æðstu ráðamönnum Hisbollah.