Þann 13. september á síðasta ári fannst Thompson látinn í niðurníddum fangaklefa og var lík hans þakið óhreinindum og skordýrum. Klefinn var svo skítugur að fangaverðir klæddust eiturefnabúningum þegar þeir fóru inn í klefann að sögn Washington Post.
Thompson hafði verið étinn lifandi af veggjalúsum að sögn Michael Harper, lögmanns fjölskyldu hans. Í samtali við Insider sagði hann að Thompson hafi í raun verið skilinn eftir í fangaklefanum. Ætlunin hafi verið að flytja hann á sjúkradeild fangelsisins en það hafi ekki gerst og hann hafi fundist látinn, étinn lifandi af veggjalúsum.
Fjölskylda Thompson, sem býr í Alabama, vissi ekki að hann væri í fangelsi. Frétti fyrst af því þegar henni var tilkynnt um andlát hans.
The Guardian segir að krufning hafi ekki skorið úr um dánarorsök hans en tekið sé fram í skýrslu réttarmeinafræðinga að gríðarlegur fjöldi skordýra hafi verið á líkinu og í fangaklefanum. Einnig kemur fram í skýrslunni að Thompson hafi verið með skurði og sár á líkamanum sem hafi verið afleiðing þess að hann kroppaði í eigin húð.
Fjölskylda Thompson hefur farið fram á að andlát hans verði rannsakað og allar kringumstæður því tengdar.