Live Science segir að engin hætta steðji að fólki né fæðukeðjunni í Bandaríkjunum að mati bandaríska landbúnaðarráðuneytisins.
Live Science að ráðuneytið hafi skýrt frá þessu í fréttatilkynningu sem það sendi nýlega frá sér. Í henni kemur fram að kúariðan hafi greinst í 5 ára kýr frá Tennessee. Kýrin hafi verið úrskurðuð óhæf til slátrunar og hafi ýmsar rannsóknir verið gerðar á henni í kjölfarið.
Segir ráðuneytið að kýrin hafi ekki farið inn í slátrunarferlið og því steðji engin hætta að fæðukeðjunni eða heilbrigði fólks.
Verið er að rannsaka upptök smitsins en ráðuneytið telur líklegt að um einangrað tilfelli sé að ræða.
Kúariða, BSE, er taugasjúkdómur í nautgripum. Það eru prótínsýklar sem valda honum en þeir eru á yfirborði frumna. En þessir prótínsýklar hegða sér afbrigðilega í sjúkdómum á borð við kúariðu og láta aðra prótínsýkla gera það sama.
Prótínsýklarnir hafa áhrif á prótín í heilanum og miðtaugakerfinu og valda fjölda einkenna, þar á meðal hegðunarbreytingum, samhæfingarvanda, þyngdartapi, minni mjólkurframleiðslu og að lokum dauða.
Til eru tvær tegundir BSE. Hin klassíska sem þróast þegar nautgripur étur sýkta fæðu, til dæmis kjöt eða bein úr sýktum nautgrip. Síðan er afbrigðilega afbrigðið sem myndast af sjálfu sér í eldri dýrum. Tilfellið, sem skýrt er frá hér fyrir ofan, er í þessum flokki og því þarf ekki að hafa eins miklar áhyggjur af því.