Bandaríska geimferðastofnunin NASA boðaði nýlega til blaðamannafundar til að ræða niðurstöður rannsóknar á fljúgandi furðuhlutum. Þar er átt við tilkynningar um fljúgandi hluti sem ekki reyndist unnt að bera kennsl á.

Sérstakur rannsóknarhópur var settur á laggirnar í júní á síðasta ári til að rannsaka tilkynningar um óþekkta hluti sem tilkynnt hefur verið um í lofti, neðansjávar og í geimnum. Hópurinn fékk fjárveitingu upp á 100.000 dollara til að sinna verkefninu. Í honum eru meðal annars Scott Kelly, fyrrum geimfari, auk 15 annara einstaklinga sem koma úr ýmsum áttum. Þar á meðal eru stjörnufræðingar, haffræðingar og blaðamenn.

Live Science segir að á blaðamannafundinum hafi komið fram að nefndarmenn hafi lagt áherslu á að stærsta hindrunin á öðlast skilning á þeim fyrirbærum, sem rannsóknin nær til, sé skortur á upplýsingum og gögnum.

Daniel Evans, yfirmaður hjá NASA, sagði að samt sem áður sé það hlutverk NASA að veita þessum málaflokki athygli og rannsaka ítarlega því áhugi almennings á málum af þessu tagi virðist vera í sögulegu hámarki.

Hann sagði að rannsókn hópsins beinist fyrst og fremst að því að öðlast betri skilning á hvað er í háloftunum og gera þau öruggari. Það sé skylda bandarísku þjóðarinnar að skera úr um hvort þessi fyrirbrigði séu ógn við öryggi í lofthelgi landsins.

Niðurstaða blaðamannafundarins var að enn sem komið er hefur rannsóknarhópurinn ekki fundið neinar sannanir fyrir að flugför, eða önnur för, frá öðrum plánetum hafi verið stödd hér á jörðinni eða nærri henni.