Nýlega datt Luan Nam, 72 ára krókódílabóndi, ofan í krókódílagryfju þegar hann var að reyna að ná einum krókódíl út úr búri. Dýrið beit í prikið, sem hann notaði, og dró hann ofan í gryfjuna. Um 40 krókódílar réðust á hann og bitu og átu hluta af líkama hans.

Sky News skýrir frá þessu og segir að þetta hafi átt sér stað nærri Siem Reap í Kambódíu.

Mey Savry, lögreglustjóri, sagði að krókódílarnir hafi bitið annan handlegginn af Nam og að búkur hans hafi verið þakinn bitförum.

Nam var formaður samtaka krókódílabænda á svæðinu.

Fjölskylda hans er sögð hafa hvatt hann til þess árum saman að hætta ræktun krókódíla. Þeir eru ræktaðir vegna eggja þeirra, húðar og kjöts.