Það er ekki alltaf auðvelt að finna draumahúsið. Fólk gerir sér ákveðnar væntingar en þær geta auðvitað verið óraunhæfar, nú eða þá að það eru einfaldlega engin hús til sölu sem standa undir væntingum.

Það verður því oft að sætta sig við að fá ekki allar óskir sínar uppfylltar þegar hús er keypt.  En auðvitað eru ákveðin atriði sem fólk gefur engan afslátt af þegar kemur að húsakaupum.

Merki um það má sjá í Bretlandi þar sem hús eitt var auglýst til sölu. Það lítur mjög vel út að utan en þegar fólk sér inn í það hefur það nákvæmlega engan áhuga á að kaupa það

Húsinu er lýst sem einbýlishúsi með fjórum svefnherbergjum, alrými, bílskúr og frábærum garði.

Ekki er annað að sjá en að vel hafi verið hugsað um húsið þar sem það virðist vera í góðu standi. En eins og áður sagði þá missir fólk áhuga á því þegar það sér inn í það.

Ástæðan er að allt er fjólublátt. Veggirnir, gólfin, loftið og gardínurnar. Meira að segja baðherbergið er fjólublátt með hvítum skreytingum.

Það er auðvitað hægt að mála yfir fjólubláa litinn en það gefur auga leið að það er stórt og tímafrekt verkefni og virðist fólk bara ekki leggja í það.