Í byrjun maí hefjast réttarhöld í Glostrup í  Danmörku í einu umtalaðasta morðmáli síðari ára. Þrítugur maður mun þá sitja á sakamannabekknum en hann er ákærður fyrir að hafa myrt Louise Borglit árið 2016. Hún var langt gengin með barn sitt þegar ráðist var á hana í almenningsgarði og hún stungin 11 sinnum. Barn hennar lést einnig.

Rannsókn lögreglunnar miðaði lítið framan en öllum á óvörtum tilkynnti hún á síðasta ári að hún hefði haft uppi á meintum morðingja Louise.

Það var gert með því að starfsmanni dönsku leyniþjónustunnar var komið fyrir í Enner Mark fangelsinu. Hann var sagður vera að afplána dóm. Markmiðið með dvöl hans þar var vingast við manninn sem er ákærður fyrir morðið. Hann var þá að afplána dóm fyrir morðtilraun.

Hann náði að vinna sér trúnað hans og á endanum trúði hinn ákærði leyniþjónustumanninum fyrir að hann hefði stungið Louise til bana.

Saksóknarinn í málinu hefur lagt fram kröfu um að leyniþjónustumaðurinn komi fyrir dóm sem lögreglumaður 488A og þurfi ekki að veita frekari upplýsingar um hver hann er. Rökin fyrir þessu er að leyniþjónustan, sem aðstoðaði lögregluna við rannsókn málsins, telur brýnt að halda því leyndu hver maðurinn er öryggis hans vegna.