Íranska ríkisfréttastofan IRNA segir að samkvæmt upplýsingum frá innanríkisráðuneytinu hafi fólk verið handtekið og yfirheyrt vegna málsins og hafi þetta átt sér stað í mörgum borgum, þar á meðal höfuðborginni Teheran.
Í tilkynningu frá ráðuneytinu segir að markmiðið með því að eitra fyrir stúlkunum hafi verið að koma í veg fyrir að kennsla færi fram í skólum þeirra. Segir einnig að til þessa hafi verið notuð skaðlaus en lyktarmikil efni.
Margar fréttir hafa borist af veikindum skólastúlkna á síðustu mánuðum og hefur það orðið til þess að margar stúlkur þora ekki að mæta í skólann.
Íranskir stjórnmálamenn hafa sagt að hugsanlega hafi íslamskir harðlínumenn verið að verki en aðgerðasinnar telja eitranirnar tengist frekar mótmælum, sem hófust í september í kjölfar dauða Mahsa Ami. Margar skólastúlkur hafa tekið virkan þátt í mótmælunum, hafa tekið höfuðslæður sínar niður og eyðilagt myndir af æðsta klerki landsins, Ayatollah Ali Khamenei, og óskað honum dauða.
Hafa írönsk stjórnvöld verið sökuð um að standa á bak við eitranirnar.
