61 árs slátrari lést nýlega þegar hann var við störf í sláturhúsi í Hong Kong. Svínið, sem hann ætlaði að slátra, velti honum um koll og lenti hann á 40 cm löngum kjöthníf og hlaut mikið sár af. Lést hann síðan af völdum áverka sinna.

CNN segir að slátrarinn hafi ætlað að slátra svíninu og hafi verið búinn að gefa því rafstuð með rafbyssu. Það hafi hins vegar komist aftur til meðvitundar og velt slátraranum um koll.

Samstarfsmaður hans kom að honum meðvitundarlausum með kjöthnífinn í höndinni og sár á vinstri fæti. Hann var fluttur á sjúkrahús en ekki tókst að bjarga lífi hans.

Lögreglan og vinnueftirlitið rannsaka nú málið.