Það gerist stundum að fólk deili um bílastæði en sem betur fer er sjaldgæft að slíkar deilur endi með ofbeldi og hvað þá morði. En það gerðist á föstudaginn í Arizona í Bandaríkjunum. Þá drap 61 árs maður 63 ára mann eftir deilur um bílastæði.

Lögreglan í Mesa skýrði frá þessu. Í tilkynningu hennar segir að út frá myndbandsupptökum og frásögnum vitna liggi fyrir að Christopher Heimer, 63 ára, hafi verið ekinn niður af hinum 61 árs John Lagana þegar hann var á göngu á gangstétt.

Lagana ók drjúga vegalengd eftir gangstéttinni og eyðilagði meðal annars marga póstkassa áður en hann sneri við og ók yfir Heimer sem lá mikið slasaður á gangstéttinni.

Því næst steig Lagana út úr bíl sínum og traðkaði ítrekað á höfði Heimer. Þá dró vitni upp skotvopn og skaut fjölda skota í jörðina í kringum Lagana sem þorði þá ekki að leggja á flótta og var því enn á vettvangi þegar lögreglan kom.

Lagana var í kjölfarið úrskurðaður í gæsluvarðhald. Hann getur þó losnað úr því ef hann greiðir 2 milljónir dollara í tryggingu.

Talið er að til deilna hafi komið á milli Heimer og Lagana eftir að Heimer bannaði Lagana að leggja nærri heimili hans. New York Post segir að þetta hafi ekki verið í fyrsta sinn sem þeir deildu um bifreiðastæði.