„Við höfum fundið ný gögn og nýjar sannanir. Þetta eru ekki réttarmeinafræðileg sönnunargögn, en sönnunargögn. Á grunni þessara sönnunargagna eru við sannfærð um að hann hafði drepið Madeleine McCann,“ sagði Hans Christian Wolters, sem stýrir rannsókn þýsku lögreglunnar, í samtali við portúgölsku CMTV sjónvarpsstöðina í þættinum Sabado.
Samkvæmt fréttum erlendra fjölmiðla þá eru það hlutar úr náttfötum Madeleine sem Wolters vísar til. Eru þessir hlutar sagðir hafa fundist í bíl Christian B.
Foreldrar Madeleine hafa ekki gefið upp vonina um að sjá hana aftur á lífi en þýska lögreglan segist fullviss um að hún hafi verið myrt.
Christian B. afplánar nú fangelsisdóm fyrir nauðgun á 72 ára bandarískri konu í Portúgal fyrir mörgum árum. Hann afplánar dóminn í þýsku fangelsi.
Í Sabado sagði Wolters að hann telji að Madeleine hafi verið myrt og að Christian B. hafi verið að verki. Þegar þáttastjórnandinn spurði hann hvort það sé satt að lögreglan hafi fundið eitthvað, sem tilheyrir Madeleine, í bíl Christian B svaraði Wolters: „Ég vil ekki tjá mig um einstök atriði rannsóknarinnar.“
En þáttastjórnandinn gafst ekki upp og sagði: „En þið vísið því ekki á bug?“
„Ég vísa því ekki á bug,“ sagði Wolters.
Samkvæmt þýskum lögum má lögreglan ekki gera upplýsingar, tengdar yfirstandandi lögreglurannsóknum, opinberar fyrr en búið er að kynna þeim grunaða og lögmanni hans þær. Það hefur ekki enn verið gert í þessu máli að sögn breskra fjölmiðla.