Með því að rannsaka DNA, sem fannst í beinaleifum og tönnum í hellum í suðurhluta Síberíu, hefur vísindamönnum tekist að púsla saman mynd af samfélagi Neanderdalsmanna.

The Guardian segir að vísindamenn hafi rannsakað DNA úr þrettán Neanderdalsmönnum, körlum, konum og börnum. Þetta hafi varpað ljósi á áhugavert net ættartengsla, þar á meðal voru faðir og unglingsdóttir hans, frændi föðurins og tveir fjarskyldari ættingjar hans.

Allt var fólkið mikið innræktað en vísindamennirnir telja það afleiðingu af hversu fáir Neanderdalsmennirnir voru. Þeir bjuggu í litlum samfélögum á víð og dreif, oft ekki nema 10 til 30 einstaklingar í hverju samfélagi.

Laurits Skov, aðalhöfundur rannsóknarinnar, sagði að sú staðreynd að fólkið hafi allt verið uppi á sama tíma sé „mjög spennandi“ og gefi til kynna að það hafi tilheyrt sama samfélaginu. Venjulega finnast leifar Neanderdalsmanna einar og sér og oft eru mörg þúsund ár á milli þess tíma sem einstaklingarnir voru uppi. Fram að þessu hefur ekki verið hægt að segja til um hvort einstaklingarnir hafi tilheyrt samfélagi eða lifað einir.