Árið 2018 var Sylvester Zottola skotinn nokkrum skotum í höfuðið og líkama þar sem hann var á McDonald‘s veitingastað í New York.  Lögreglan taldi strax að um leigumorð á vegum mafíunnar hafi verið að ræða en Sylvester var mafíuforingi.

Sky News skýrir frá þessu. Í gær var sonur Sylvester, Anthony Zottola, sakfelldur fyrir samsæri um morðið og að hafa ætlað að láta myrða bróður sinn, Salvatore Zottola. Markmiðið með þessu var að komast yfir fasteignaveldi fjölskyldunnar en það er metið á tugi milljóna dollara.

Auk Anthony var Himen Ross sakfelldur fyrir morðið og morðáætlun. Réttahöld höfðu þá staðið yfir í sex vikur. Þeir eiga báðir ævilangt fangelsi yfir höfði sér.

Anthony réði Himen Ross til að annast morðin eftir að öðrum leigumorðingja, Ron Cabey, hafði mistekist eftir að hafa reynt nokkrum sinnum að myrða Sylvester á nokkurra mánaða tímabili. Cabey bar vitni fyrir dómi.