Læknum á Patna Medical Collega Hospital í Bihar á Indlandi brá mikið fyrr í mánuðinum þegar þeir rannsökuðu 22 ára karlmann sem kvartaði undan miklum magaverkjum.

Á röntgenmyndum sást að í endaþarmi hans var 14 cm langur stálbolli fastur. Að vonum kom bollinn í veg fyrir að maðurinn gæti haft hægðir og þar af leiðandi fann hann til mikilla verkja.

Daily Mail segir að 11 lækna hafi þurft til að fjarlægja bollann úr endaþarmi mannsins.

Kumar Vaibhav Sharma, skurðlæknir, sagði að maðurinn hafi gengist undir aðgerð nokkrum klukkustundum eftir að hann var lagður inn. Komust læknarnir að bollanum í gegnum maga mannsins.

Maðurinn sagðist ekki muna hvernig bollinn endaði í endaþarmi hans en mundi að hann var ölvaður þegar það gerðist.

„Þetta er mjög sjaldgæft og sést aðallega hjá fólki sem glímir við andleg veikindi eða er ölvað,“ sagði Sharma.