CNN segir að hvítur hattur, sem Melania notaði í opinberri heimsókn, vatnslitamynd af henni með hattinn og merki með mynd af málverkinu hafi verið boðið upp.
Þegar uppboðinu lauk höfðu aðeins fimm boð borist í munina þrjá, öll nærri 1.800 Solana markinu en Solana er rafmynt sem Trump hafði sett sem skilyrði að yrði notuð til að greiða fyrir hlutina.
Lágmarksboð í Solana voru uppfyllt en samt sem áður náðist 250.000 dollara lágmarkið ekki því á síðustu tveimur vikum, nánast sama tíma og uppboðið stóð yfir, lækkaði gengi Solana um 40%. CNN segir að því hafi aðeins fengist um 170.000 dollarar fyrir munina, 80.000 dollurum minna en upphafsboðin áttu að vera. Talsmenn Melania svöruðu ekki fyrirspurnum CNN um uppboðið eða hversu stór hluti ágóðans af því og fyrri uppboðum hafi runnið til góðgerðarmála en Trumphjónin hafa lýst því yfir að hluti ágóðans eigi að renna til góðgerðarmála.
