Eins og staðan er núna virðist ekki vera tilefni til að hafa meiri áhyggjur af því en upphaflega afbrigði Ómíkron, sem heitir BA.1, eftir því sem segir í umfjöllun Sky News. Fram kemur að sérfræðingar telji að bóluefni virki vel gegn þessu afbrigði og að það leiði ekki til meiri og alvarlegri veikinda en BA.1 afbrigðið. En það er ekki útilokað að þetta afbrigði sé enn meira smitandi en BA.1.
Bresk heilbrigðisyfirvöld segja að afbrigðið sé til rannsóknar en enn sé ekki mikið um smit af þess völdum á Bretlandseyjum. Í Danmörku er BA.2 nú á bak við um helming daglegra smita af völdum kórónuveirunnar. Þar hefur engin munur sést á fjölda sjúkrahúsinnlagna hjá þeim sem smitast annars vegar af BA.1 og hins vegar af BA.2. Danskir embættismenn segja að ekki sé að sjá annað en að bóluefni virki gegn BA.2. En sá fyrirvari er settur við þetta að þörf sé á ítarlegri gögnum um afbrigðið og þá sérstaklega hvort það sé enn meira smitandi en BA.1.
Anders Fomsgaard, yfirlæknir hjá dönsku smitsjúkdómastofnuninni, sagði í samtali við TV2 að frá því að Ómíkron barst til Danmerkur í desember hafi smittölurnar bara farið í eina átt, upp á við. Í gær greindust rúmlega 42.000 smit og á föstudaginn voru þau um 46.000. Nýjustu spár heilbrigðisyfirvalda gera ráð fyrir að fjöldi daglegra smita geti verið kominn upp í um 60.000 í lok janúar.
Danskir sérfræðingar hafa síðustu daga rætt um að hugsanlega náist hjarðónæmi í Danmörku innan nokkurra vikna vegna mikillar útbreiðslu Ómíkron en Fomsgaard sagði að þetta hjarðónæmi geti nú verið í hættu vegna BA.2. „Það er mögulegt að smitast af BA.1 fyrst og þá er maður ekki ónæmur fyrir smiti af völdum BA.2,“ sagði hann í morgunþætti TV2, Go morgen Danmark, og benti á að dæmi um þetta hafi sést í Noregi, þar sem BA.2 hefur sótt í sig veðrið. Hann sagði að ef það sama gerist í Danmörku verði fólk að undirbúa sig undir að faraldurinn muni rísa á nýjan leik og ná toppnum á nýjan leik.
