Anthony Fauci, yfirmaður bandarísku sóttvarnarstofnunarinnar, CDC, hefur, líkt og kollegar hans víða um heim, orðið að brennidepli Covid deilunnar þar í landi. Fauci fær þó eitthvað fyrir sinn snúð, en Fox News greindi frá því í lok desember síðastliðins að hann væri nú hæst launaði opinberi embættismaður Bandaríkjanna.

Í gær var Fauci svo kallaður fyrir þingnefnd öldungadeildarinnar þar sem litlu munaði að upp úr syði milli hans og þingmanna Repúblikana. Þingmennirnir létu ýmsar spurningar og ásakanir dynja á lækninum sem svaraði fullum hálsi.

Rand Paul, öldungadeildarþingmaðurinn umdeildi frá Kentucky gerði laun Fauci að umtalsefni og spurði hann hvort rétt væri að nota gífurlega háu laun sín til þess að ráðast á vísindamenn sem eru honum ósammála. „Ég held, eins og venjulega, ert þú að afbaka allt sem ég hef sagt,“ svaraði Fauci. „Þú hefur rangt fyrir þér, þú hefur nánast alltaf rangt fyrir þér,“ bætti hann við.

Við tók nokkurra mínútna orðaskipti þeirra Fauci og Paul, sem sjá má hér að neðan.

Við tóku spurningar frá öðrum þingmönnum. Þeirra á meðal Roger Marshall, þingmaður Kansas, sem spurði Fauci hvort til greina kæmi að opinbera sínar einkafjárfestingar. Sem áður svaraði Fauci ákveðið og sagði að slík skrá væri þegar opinber og að hann hefði þurft að gefa slíkar upplýsingar upp í 35 ár.

Aftur tókst Fauci á við þingmann Repúblikana í nokkrar mínútur þar til þingmaður Demókrata greip inn í og tók sér orðið.

Fauci hvíslaði þá að kollega sínum „hvílíkur hálfviti,“ en vissi líklega ekki að hljóðneminn sem hann hafði fyrir framan sig væri enn í gangi.

Upptakan af Fauci kalla þingmanninn hálfvita gengur nú manna á milli á netinu, en hljóðbrotið má heyra hér að neðan.

„What a moron.“

— Dr. Fauci on a hot mic after a heated exchange with Sen. Roger Marshall (R-KS), who demanded one of Fauci’s financial disclosures (which Fauci insists is already public). pic.twitter.com/NtN6NDsomW

— The Recount (@therecount) January 11, 2022