Í janúar á síðasta ári kom Andrew McGinley heim til sín í Dublin. Þar mætti honum hræðileg sjón. Börnin hans þrjú voru lífvana í húsinu. Connor, 9 ára, Darragh, 7 ára, og Carla, 3 ára, höfðu öll verið myrt. Það var móðir þeirra, hin 44 ára Deidre Morley, sem hafði framið þennan hryllilega verknað.

Hún var síðar fundin sek um morðin en úrskurðuð ósakhæf þar sem hún glímdi við mikið þunglyndi þegar hún myrti börnin sín.

Andrew ræddi nýlega við Irish Mirror um málið og sagði þá meðal annars að síðustu orð sonar hans sæki sífellt á hann. Hann heyri sífellt Connor segja: „Stoppaðu mamma, hvað ertu að gera?“ en þetta sagði hann þegar móðir hann setti plastpoka yfir höfuð hans. Deidre skýrði frá þessu við yfirheyrslur.

„Ég stend í erfiðri baráttu því allt sem ég heyri eru síðustu orð Connors. Þau endurtaka sig í sífellu í höfði mér,“ sagði hann og bætti við að hjónaband hans og Deidre eigi sér enga framtíð, samband þeirra geti aldrei orðið eðlilegt á nýjan leik.

„Ég veit að ég er gjörbreyttur. Ef ég get hjálpað henni með meðferð hennar eða á lagalega sviðinu þá geri ég það og það veit hún,“ sagði hann einnig.

Deidre, sem starfaði sem hjúkrunarfræðingur, neitaði sök fyrir dómi og bar fyrir sig geðveiki á þeirri stundu er hún myrti börnin. Tveir sálfræðingar tóku undir þetta.

Áður en hún kyrkti börnin og kæfði hafði hún reynt að deyfa þau. Hún vildi sjálf deyja og ætlaði að taka börnin með sér í dauðann. Kvöldið fyrir voðaverkið setti hún morfín í mat drengjanna og drykkjarflösku Carla. En þau spýttu því öll út.