Ítalska ríkisstjórnin þrengir nú að óbólusettum Ítölum, það er að segja þeim sem ekki hafa fengið að minnsta kosti tvo skammta af bóluefni gegn kórónuveirunni. Nú verður fólk að sýna fram á að það sé bólusett eða hafi jafnað sig eftir smit til að fá aðgang að hótelum, veitingastöðum, til að nota skíðalyftur og almenningssamgöngufarartæki.

Fram að þessu hefur einnig verið nóg að sýna fram á neikvæða niðurstöðu sýnatöku.

Nýju reglurnar gilda einnig um þá sem stunda hópíþróttir. Knattspyrnufólk verður til dæmis að hafa lokið bólusetningu eða jafnað sig eftir smit til að mega spila.

Ekki liggur fyrir hver viðurlögin verða fyrir þá sem láta ekki bólusetja sig.