Sá undarlegi atburður átti sér stað nýlega á Ítalíu að búðareigandi lagði á flótta undan lögreglu eftir að hafa stolið skafmiða með 77 milljón króna vinning af viðskiptavin sínum.

Viðskiptavinurinn, kona á sjötugsaldri, hafði heppnina með sér á skafmiða og vann á honum rúmlega 77 milljónir. Hún fór aftur í verslunina þar sem hún hafði keypt miðann á föstudaginn síðasta þar sem hún bað starfsmann að staðfesta að um vinningsmiða væri að ræða.

Starfsmaðurinn leitaði til Gaetano Scutallero, eigandann um að stafesta vinninginn. Gaetano ákvað þá að halda miðanum, stökk á vespuna sína og flúði af vettvangi.

Lögregla lýsti í kjölfarið eftir Gaetano og var víðtæk leit hafin af honum. Komið var í veg fyrir að hægt væri að leysa út vinninginn og í gær tókst lögreglu svo loks að hafa hendur í hári verslunareigandans. Hann var þá staddur á flugvelli í Róm og var á leiðinni um borð í flugvél sem var á leið til Kanaríeyja.

Gaetano var þó ekki með vinningsmiðann á sér og greindi lögreglu frá því að hann hefði komið honum fyrir á öruggum stað í banka. Vill hann meina að hann sé lögmætur eigandi vinningsmiðans og segist hafa opnað nýjan bankareikning og vill fá vinninginn greiddan út.

Konan sem kveðst vera vinningshafinn hefur kært Gaetano fyrir þjófnað, en Gaetano segist hins vegar ætla að kæra hana á móti fyrir meiðyrði.