Púertó-Ríkanski hnefaleikakappinn Félix Verdejo hefur verið handtekinn og ákærður fyrir að myrða ólétta ástkonu sína, Keishla Rodríguez. BBC greinir frá þessu.

Hinn 27 ára gamli Verdejo keppti á Ólympíuleikunum í London árið 2012, og hefur síðan gerst atvinnuboxari. Sem atvinnumaður hefur hann sigrað 27 bardaga, og þar af 17 með rothöggi, þá hefur hann tapað tvisvar sinnum. Keishla Rodríguez var jafngömul og Verdejo, en þau höfðu átt í stormasömu óopinberu ástarsambandi síðan þau voru unglingar.

Morðið á að hafa verið einstaklega óhuggulegt. Verdejo er sagður hafa kýlt Rodríguez í andlitið, bundið hana við stól, kastað henni fram af brú ofan í vatn, og í kjölfarið skotið að henni með skammbyssu er hún barðist fyrir lífi sínu í vatninu.

Móðir fórnarlambsins segir að hún hafi borið barn hnefaleikakappans, sem vildi ekki að hún myndi eignast það, vegna þess að það myndi skemma orðspor hans. Hún sagðist hafa varað dóttur sína við honum.

Ofbeldi gegn konum er gífurlega stórt vandamál í Púertó Ríkó, en í janúar lýstu stjórnvöld yfir neyðarástandi í þeim málum. Samkvæmt mannréttindasamtökum er að minnsta kosti ein kona drepin í hverri viku og slíkir glæpir allavega sextíu á síðasta ári.