Íbúum Kaliforníu, sem er fjölmennasta ríki Bandaríkjanna, fækkaði á síðasta ári og er það í fyrsta sinn sem þeim fækkar síðan skráningar hófust. Ástæðurnar fyrir fólksfækkuninni eru heimsfaraldur kórónuveirunnar, fækkun innflytjenda og lægri fæðingartíðni.

Þetta kemur fram í fréttatilkynningu frá fjármálaráðuneyti ríkisins.  Frá janúar 2020 til janúar 2021 fækkaði íbúum ríkisins um rúmlega 182.000. heildarfjöldi íbúa ríkisins var því komin niður í tæplega 39,5 milljónir. Þetta svarar til 0,46% fækkunar á milli ára. CNN skýrir frá þessu.

Rúmlega helmingur fækkunarinnar, eða um 100.000 manns, er tilkomin vegna hertra innflytjendareglna að því er segir í skýrslunni. 51.000 létust af völdum COVID-19 og var dánartíðnin í ríkinu um 19% hærri en hún var að meðaltali þrjú ár á undan. 24.000 færri börn fæddust í ríkinu en fæðingartíðni hefur farið lækkandi í Bandaríkjunum á undanförnum árum og hefur fæðingum fækkað meira í Kaliforníu en öðrum ríkjum.