Ruth Shuster náði merkum áfanga á miðvikudaginn en þá varð hún 100 ára. En það að vera orðin 100 ára þýðir ekki endilega að maður setjist í helgan stein, að minnsta kosti ætlar Ruth ekki að gera það. Hún starfar á einum skyndibitastaða McDonald‘s í Pennsylvania í Bandaríkjunum og ætlar að gera áfram.

Í umfjöllun WTAE kemur fram að hún hafi ekki í hyggju að hætta. „Aldur er bara tala,“ sagði hún í samtali við WTAE.

Hún fór út á vinnumarkaðinn þegar maðurinn hennar lést fyrir 50 árum og hefur unnið síðan. „Ég hef unnið á kvöldin síðan og mér finnst gaman að vinna,“ sagði þessi aldna kjarnakona. Hún hefur starfað á skyndibitastaðnum í 25 ár og ætlar sér að vinna þar eins lengi og hún getur.

Hún sér meðal annars um að þurrka af borðum og bjóða gesti velkomna. „Ég hef aldrei átt mikið af peningum en alltaf nóg og það er þannig sem ég vil hafa það,“ sagði hún.

Nick Delligatt, yfirmaður hennar, sagði að Ruth fái að vinna eins lengi á staðnum og hún vill. „Við njótum hvers dags sem við höfum hana. Hún er sannkölluð blessun,“ sagði hann.