Lögreglan í Cincinnati í Bandaríkjunum lagði hald á 20 kíló af kókaíni úr sendingu frá Suður-Ameríku. Cincinnati.com greinir frá. Aðferðin sem var notuð til að reyna að koma efninu til Bandaríkjanna var ansi áhugaverð.

Sendingin, sem var að millilenda í Bandaríkjunum á leið sinni til Hong Kong, innihélt morgunkorn, nánar tiltekið kornflögur, sem voru húðaðar með kókaíni. Leitarhundur hjá tollverðinum fann áhugaverða lykt af sendingunni og því var hún skoðuð nánar.

Í sendingunni voru einnig pakkar af kókaíni en mögulega hafa þeir sem sendu pakkann vonast til þess að pakkarnir yrðu teknir í burtu en morgunkornið kæmist alla leið til móttakanda. Þekkt er að smyglarar notist við frumlegar aðferðir til að koma eiturlyfjum á milli landa en blaðamaður fann ekki önnur dæmi um að morgunkorn sé húðað með þeim.