Á föstudaginn var afleysingakennari rekinn á staðnum þegar hann var að kenna í Austin‘s Bowie High School í Texas í Bandaríkjunum. Hann hafði greinilega ekki í hyggju að kenna með hefðbundnum aðferðum því hann tók karaókígræjur með sér í skólann söng síðan lög, sem Britney Spears gerði fræg, fyrir nemendurna og reyndi að kenna þeim þau.

New York Post skýrir frá þessu. Fram kemur að karaókígræjurnar hafi auk söngmöguleika verið með flotta ljósasýningu.

New York Post segir að nemendum hafi verið mjög brugðið eftir þessa undarlegu „kennslustund“ og að einn þeirra hafi tekið hana upp á myndband sem fer að sjálfsögðu sigurgöngu um Internetið þessa stundina. Það er einmitt hægt að sjá það neðst í fréttinni.

Fram kemur að kennarinn hafi verið beðinn um að yfirgefa skólann því hann hafi ekki „farið eftir kennsluaðferðum skólahverfisins“.

Andre Abelis, faðir nemandans sem tók myndbandið, sagði að þetta hafi verið undarleg uppákoma. „Þetta var mjög undarlegt. Við skildum ekki hvað þetta snerist um fyrr en sonur okkar útskýrði málið,“ sagði hann.