Á Suðurskautinu er jökull sem heitir Thwaitesjökullinn en hann er stundum kallaður „Dómsdagsjökullinn“. Nú segja vísindamenn að ísveggur fyrir framan hann muni „brotna eins og bílrúða“. Ástæðan er að hlýr sjór bræðir ísinn hægt og rólega neðan frá en það veldur því að sprungur koma í jökulinn.

BBC skýrir frá þessu. „Það munu verða miklar breytingar á jöklinum, líklega á tæpum áratug. Bæði birtar og óbirtar rannsóknir benda til þess,“ sagði Ted Scambos, jöklafræðingur og prófessor við International Thwaites Glacier Collaboration, í samtali við BBC.

Thwaitesjökullinn er engin smásmíði en hann er á stærð við Bretland eða rúmlega tvöfalt stærri en Ísland. Bráðnun hans veldur 4% af árlegri hækkun sjávarborðs. Á síðustu 30 árum hefur bráðnunarhraði hans tvöfaldast. Nú bráðna um 50 milljarðar tonna af ís úr jöklinum árlega.  Ef jökullinn bráðnar allur mun yfirborð heimshafanna hækka um 65 sentimetra.

Slíkur „dómsdagsatburður“ mun þó væntanlega ekki eiga sér stað fyrr en eftir nokkur hundruð ár að því er segir í umfjöllun BBC þar sem einnig kemur fram að vísindamenn segi að hnattræn hlýnun hafi mikil áhrif á jökulinn.

Vísindamenn hafa nú þegar tekið eftir miklum breytingum við jökulinn og nágrenni hans. Scambos sagði að ef hann hrynji muni hann taka megnið af ísnum á vesturhluta Suðurskautslandsins með sér og því sé mjög mikilvægt að finna út úr hvernig jökullinn mun hegða sér næstu 100 árin.