Vísindamennirnir vildu einnig komast að því af hverju fólki, til dæmis miðlum, finnst það ekki stressandi að heyra í látnu fólki og telja það frekar vera andlega upplifun. Þeir höfðu í huga að fólk sem þjáist af geðklofa bregst allt öðruvísi við þegar það telur sig heyra í látnu fólki. ScienceAlert skýrir frá þessu.
65 miðlar, sem eru félagar í landssamtökum breskra miðla, og 143 aðrir, sem fundust í gegnum samfélagsmiðla, tóku þátt í rannsókninni sem beindist að því að kortleggja muninn á svokölluðu „andlega sinnuðu fólki“ og meðalmanninum sem heyrir ekki í látnu fólki.
44,5% af þeim andlega sinnuðu heyrðu raddir látinna daglega en 79% sögðu að raddir hinna látnu væru hluti af hversdagslífinu. Meirihlutinn heyrði raddirnar í höfði sér en 31,7% heyrði þær einnig berast úr umhverfinu.
Í samanburði við aðra var hinum andlega sinnuðu slétt sama um skoðanir annarra á þeim og trúðu frekar á yfirskilvitlega hluti. Þetta segja vísindamenn geta verið skýringu á af hverju andlega sinnaða fólkið hafði ekki leitað sér sálfræðiaðstoðar til að draga úr ofskynjununum.
Það einkenndi einnig þá andlega sinnuðu að þeir höfðu haft óvenjulegar upplifanir með heyrn sína í æsku, þeir voru líklegri til að heyra ofheyrnir og áttu auðveldar með að hverfa inn í eigin heim þegar þeir voru að fást við verkefni og áttu þá erfiðara með að hafa yfirsýn yfir umhverfi sitt. „Meðalmaðurinn“ trúði frekar á yfirskilvitlega hluti ef hann hafði þessa sömu tilhneigingu til að hverfa inn í eiginn heim.
ScienceAlert segir að vísindamennirnir segi að niðurstöðurnar bendi til þess að fólk, sem telur sig hafa miðilshæfileika, geri það til að finna skýringar á sérstökum upplifunum sínum.
Rannsóknin hefur verið birt í vísindaritinu Mental Health, Religion and Culture. Hún getur að mati vísindamannanna komið að gagni við að öðlast betri skilning á ofskynjunum sem tengjast andlegum veikindum á borð við geðklofa.
