Þetta eru niðurstöður nýrrar rannsóknar. Fram kemur að verst sé staðan á Indlandi en þar deyr meðalmaðurinn sex árum fyrr en ella af völdum loftmengunar. Dregið hefur úr loftmengun í Kína á síðustu sjö árum en hún styttir líf Kínverja samt sem áður um 2,6 ár að meðaltali. The Guardian skýrir frá þessu.
Fram kemur að brennsla jarðefnaeldsneytis valdi loftmengun og loftslagsvandanum og að nú auki loftslagsbreytingarnar á loftmengun því fleiri gróðureldar kvikni nú en áður með tilheyrandi loftmengun og því sé komin slæm hringrás.
Rannsakendurnir segja að nýlegir atburðir hafi sýnt svart á hvítu að framtíðin velti á því hvort ríkisstjórnir grípi til aðgerða eða ekki.
„Loftmengun er stærsta utanaðkomandi ógnin við heilsufar fólks en það er ekki almennt viðurkennt eða almennt ekki viðurkennt af þeim krafti og ákefð sem reikna mætti með,“ er haft eftir Michael Greenstone, prófessor við Chicago háskóla. Hann og samstarfsfólk hans þróaði Air Quality Life Index (AQLI) sem umreiknar loftmengun yfir í áhrif á lífslíkur fólks.
Greenstone sagði að meðal jarðarbúinn lifi 2,2 árum skemur í dag vegna loftmengunar og ef ekkert verði að gert þýði þetta að 17 milljarðar æviára glatist. „Hvað annað á jörðinni veldur því að við töpum 17 milljörðum æviára?“ spurði hann.
„Það sem meira er, við leyfum þessu ekki bara að eiga sér stað, við völdum þessu. Það sem stingur mest er að stóru ríkin, með blöndu stjórnarfars og félagslegra viðmiða velja að leyfa fólki að stytta líf sitt mikið og vera veikara,“ sagði hann og bætti við að umskipti yfir í hreina og umhverfisvæna orkugjafa og eftirfylgni við aðgerðir í málum er varða loftmengun frá raforkuverum hafi dregið úr loftmengun í mörgum ríkjum.
