Par sem stóð að kynjaveislunni í Kaliforníu sem varð til þess að eldur barst í nærliggjandi skóg og breiddist þar út hefur verið ákært fyrir manndráp af gáleysi, en slökkviliðsmaður lést í eldinum. Parið neitar sök í málinu.
Eldurinn braust út 5. september síðastliðinn þegar reykvél sem parið hafði komið fyrir með lituðum reyk kveikti í þurru grasi sem hún stóð á. Parið reyndi að slökkva í eldinum með vatnsflöskum, en hafði ekki erindi sem erfiði.
The Hill greindi frá málinu í vikunni.
12 dögum síðar hafði eldurinn breitt út sér yfir stórt svæði þegar slökkviliðsmaðurinn Charles Morton vann með félögum sínum að því að fella tré og rjúfa gróðurinn til þess að hefta útbreiðslu skógareldsins. Í lýsingu The Hill segir að eldurinn hafi breiðst hraðar út en þeir gerðu ráð fyrir og að Morton hafi ekki náð að koma sér undan logunum.
Slökkviliðsmenn náðu loks tökum á eldinum í nóvember, en þá höfðu 90 ferkílómetrar brunnið. 13 slösuðust og fimm heimili eyðilögðust í brunanum.
Parið er ákært fyrir manndráp af gáleysi, brennu, skemmdarverk og fyrir að hafa valdið líkamsáverkum með íkveikju. Málið verður tekið fyrir af dómstólum ytra 15. september næstkomandi.
Málið er ekki það fyrsta af þessum toga, en árið 2017 setti blálituð sprengja í kynjaveislu af stað skógareld sem kveikti í 190 ferkílómetra af skóglendi. CNN birti myndband af sprengjunni á heimasíðu sinni árið 2018, sem sjá má hér.
